Ana səhifə

Jer 1: 1 Hiche lekhabua hi Benjamin gam, Anathoth khoa Thempu ho lah a Hilkiah chapa Jeremiah thusei kisun ahi


Yüklə 209.34 Kb.
səhifə1/9
tarix19.06.2016
ölçüsü209.34 Kb.
  1   2   3   4   5   6   7   8   9
Jeremiah

Jer 1:1 Hiche lekhabua hi Benjamin gam, Anathoth khoa Thempu ho lah a Hilkiah chapa Jeremiah thusei kisun ahi.


Jer 1:2 Judah gam a Amon chapa Josiah vaipoh kal kum som le kumthum lhinin Pakaiyin Jeremiah koma thu aseiyin,
Jer 1:3 Josiah chapa Jehoiakim lengvaipoh laiyin jong asei kit’e. Hiche nung hin jong Josiah chapa Zedekiah lengvaipoh kal kum som le kum khat geiyin jong Pakaiyin thu tamtah vei aseiye. Chuche kum lha nga nan Jerusalem mite min sohchangin akaitauve.
Jer 1:4 Pakaiyin kajah a,
Jer 1:5 “Naobua kagondoh masanga kagel tohsa, napen lhah masanga namtin vaipi henga Themgao dia kalhen dohsa nahitai,” ati.
Jer 1:6 Kenjong, “Ka-e, Pakai Pathen kachapang behseh-in thuseije jong kahepoi,” kati.
Jer 1:7 Ahivangin Pakaiyin kajah a, “Nachapan kison lelpi dan, kasol solna nachea, seiyin kati ti nasei ding ahibouve.
Jer 1:8 Miho kicha hih-in, nalhon ping ting nahong jing nange. Kei-Pakaiyin kasei ahitai!” ati.
Jer 1:9 Hichun Pakaiyin kanephute ni athamin kajah a, “Ngaiyin, nasei ding thu jouse kakhumpeh ahi.
Jer 1:10 Tunia ken nang hi namtin vaipi le lenggam jouse kalkang soh a loilhu ding le sumang ding, lekhup ding, chutengle sadoh kit’a thingphua phut dia tha kapeh nahitai,” ati.
Jer 1:11 Pakaiyin, “Jeremiah ipi namum?” eiti. Kenjong, “Jonmot thingbah khat,” kati.
Jer 1:12 Pakaiyin, “Nasei khai, chule kasei jouse guilhung cheh dia kavet Ihih jing ahi,” ati.
Jer 1:13 Pakaiyin kahenga asei kit’in, “Adang ipi namum?” eiti. Keiman, “Sahlam a twibel kisong phul let lut khat kamun, hilama kibokhup akigoi,” kati.
Jer 1:14 Hichea hin Pakaiyin, “Sahlama konin manthahna twisa ki-omsou bangin hungin tin, hiche gamsunga chengte chunga chu ding,
Jer 1:15 hiche bol dia chu sahlama cheng namtin vaipi kakousuh ahi. Alengteuvin Jerusalem kulpi kelkot dung Ie Judah gam khopi dang ho kelkot phung dunga laltouna akido diu ahi.
Jer 1:16 Achonset jeh-uva kamite talen kapeh ding ahi; Kei eidon dauvin, pathen dang ho pou kithoi nan aneiyui, chule milimdoi asem’un chibai aboh-uve.
Jer 1:17 Kigon Jeremiah, kasei jouse hi gaseipeh tan. Amaho kicha hih-in, achutiloule alah-uva naum teng hakia kakichatsah ding nahi.
Jer 1:18 Ngaiyin Jeremiah! Hiche gamsunga cheng Judah lengte, vaibol ho, Thempute chule mipin nadousoh keidiu ahi.
Jer 1:19 Hijongle nadou jouna dia tunia thahat kapeh nahi. Kulpi kikaikhum khopi, thih khom tobang, sum-eng pal tobang nahi ding ahi. Kaumpia kahon jing ding nahin, amahon najou pouvinte. Kei-Pakaiyin kasei ahitai,” ati.
Jer 2:1 Pakaiyin kajah a
Jer 2:2 hiche thu hi Jerusalem mitin henga kaphonjal din eihil’e: “Nakhangdon laiya nakitahna kagel jingin, Ikichentil laiya nei ngailutje kahei; Muchi tuna louhel gamthip’a Keima neijui le lei!
Jer 2:3 Vo Israel, Keiya mong mong nahin, Kagou thengsel nahibouve! Nabolsete jouse Gim genthei kalhakhumjie! Kei-Pakaiyin kasei ahitai,” ati.
Jer 2:4 Jacob chilhah, Israel phung miten Pakai thusei ngaiyun.
Jer 2:5 Pakaiyin aseiyin: “Napu napateuvin ipia eithemmo sah-uva, I-bol’a eidalhah jengu ham? Pannabei milimdoi semthu ahouvun, Amaho geiyin pannabei asoh tauve!
Jer 2:6 Kei eikhohsah dauvin, Egypt’a kona kahuhdoh a Gamthip lai kapui galkai vangin, Mihem jot khah louhel gam, Gamthip nelgo lah mihem chenna lou kichat um kajotpi vangin eikhohsah pouve.
Jer 2:7 Louma soh le gamga pha nedin Gampha laitah a kahin puilut’e. Ahinla agamsung asuse gam’un, Kapehna gam chu asuboh tauve.
Jer 2:8 Thempuhon la, ‘Pakai hoiya umtam?’ atipouvin, Kathempuhon eihepouve! Gamvaipoten eidouvun, Themgaoten Baal minin thu agaovun, Pannabei milimdoi ahouvui!
Jer 2:9 “Hijeh a chu Kei-Pakaiyin kamite kaheh kit ding, Atu achateu themmo kachan ding ahi.
Jer 2:10 Lhumlam Cyprus twikol gama cheuvin, Nisolam Kedar gama mi sol’un. Hoikom mun hijongle Hitobang thilsoh hi gamu pouvin nate.
Jer 2:11 Pathen tah ahou lou vangun, Koimacha nam-in a-pathenu akhel ngaipoi. Ahinla kamiten achoian’uva pang Pathen Keima hi Imacha bolpeh thei lou pathente to eikhel tauve.
Jer 2:12 Vanthamjol’in jong datmoa Tija kithing din kaseipeh tai!
Jer 2:13 Ajeh chu kamiten chonsetna ni abol’ui: Hinna twinah Keiya konin akihei mangun, Twi beina twisamphungpi chu Twi holnan alai laiyui!
Jer 2:14 “Israel hi soh ahipon, Soh cha jong ahipoi. I-bol’a amelmaten nehgam dia agot ham?
Jer 2:15 Sakei kisen bangin akisen khum’un, Agamsunga mi adeljam’un gamthip asouvin, Akhopi jouseu jong la asesoh tan, Akeohel’in akijamsoh tauve!
Jer 2:16 Memphis Ie Tahpanhes miten Alhoh avojah tauve!
Jer 2:17 Vo Israel, nang le nang kibol nahi! Kei napuile jing Pakai na-Pathen neidalhai.
Jer 2:18 Ipi phatchom ping tia Egypt a chego nahim? Nile luidung twi don go nahim? Ipi phatchom ping tia Assyria chego nahim? Euphrates luidung twi nadon got ham?
Jer 2:19 Nathilse bol’in nagentheisah a, Neidondan themmo nachansah ding ahi. Pakai na-Pathen neidalhah a Kitah loutah a naum Adih loule akhohje hedoh tan nate. Kei-Pakai Hatchungnung penin kasei ahitai,” ati.
Jer 2:20 Thaneipen Pakaiyin aseiyin: “Israel sot’a pat kathaneina nadondan, Kathu ngaiyin chibai neiboh poi. Lhang sang lai lai le Thingna lim noi dunga Leiphatna pathen hou nan Noti chon bangin nachontai!
Jer 2:21 Muchi phapen lengpigui lhentum banga kaphu nahin, Kivetemin iti nahitah em! Pannabei lengpigui gopsa bep nahitai.
Jer 2:22 Sabon chih tah-in kisop jongle chun Nathemmona nen mu jing inge.
Jer 2:23 Kisuboh Iouva nakisei theiya, Baal hou kha louva iti nakisei thei ding ham? Ven phaichama chu ipi nabol’a, Itobanga chonse nahim. Gamlah sa-ngan tinpeh kikhet peh Kilhasoa lhaile nabangme!
Jer 2:24 Gamthip lai lai nadel len, Tinpeh akikhet teng hutuh jou ahipoi. Akitimatpi nom sa-ngan chal dia baicha ahin, Akimatpi nom chanin akimatpi theiye.
Jer 2:25 Vo Israel, pathen dang nadel le naa Kengchol loule dangchah lou nahim? Nangin jong, ‘Lung hei kit dan kahipoi, Gamdang pathente kadeijon, Hiche ho hi kahou ding ahi,’ nati,” ati.
Jer 2:26 Pakaiyin aseiyin, “Gucha akimatdoh teng ajum banga Israelte nabonchauva, nalengteu hihen vaibolte hile, Nathemputeu le Nathemgaoteu geiya jachat nakimusoh kei diu ahi.
Jer 2:27 Najachatsoh hel diu ahi, thingphung pou napa nahisah-un, songpi pou nanu nahisah-ui. Neidonda jeh-uva hiche hi soh tei ding ahi. Hahsa nato tengu le kahung huhhing diuvin nei-ngeh-ui.
Jer 2:28 “Nakisemthuu pathente chu hoiya um tam? Mihuhhing thei ahiule nahahsat teng kihuhhingsah tangu! Vo Judah, nakhopi jat’in pathen tampi naneiyui.
Jer 2:29 I-bol’a kiphin nahiuvem? Idia neidouvu ham?
Jer 2:30 Talen kamatsah vangun napha chompouve; kasemphat ding nadei mouve. Sakei hangtah bangin Nathemgaote nathat gamtauve.
Jer 2:31 Israel chaten kasei ngaiyun! Nang ho dinga nelgam le gamthim chule tijat umtah gam kahim? I-bol’a kaheng hinjon kit louva naning nanop’a chon dia kisei nahiuvem?
Jer 2:32 Nu-ngah-in asanapah jem asuhmil theiya, mouthah-in ajineina von asuhmil theiyam? Kamiten simsen lou nikho hijat sung hin eisumil tauve.
Jer 2:33 Dongma nung juije la kichentah-in nahen, numei mimo pen geiyin kihilnan naneiye.
Jer 2:34 Gucha hoa joh hilouvin, themmonabeite le tahlelte thisan jeng naponsil adimsoh tai. “Thilse hijatpi boltaa jong,
Jer 2:35 ‘Themmona kaneipoi, kachunga bon Pakai alung hang tapoi,’ nati. Nachonset naseilep jal’a Kei-Pakaiyin talen kapeh ding nahi.
Jer 2:36 Namtin vaipi pathente nahoujeh-in nakisupoi del’e. Assyria miten nalung himosah banga Egypt miten jong nalung himosah diu ahithouve.
Jer 2:37 Jum le ja thoh a kikolnam thangsea Egypt nadalhah ding ahi. Kei-Pakaiyin nakisonpi chengse hi kapaisa ahin, hiche hoa konin imacha phatchomna neipon nate,” ati.
Jer 3:1 Pakaiyin aseiyin, “Pasal’in ji adaa, numei chu pasal dangto akichen teng ajilui pan kipui kit thei ponte. Kichenpi kit leh gamsung asuh boh hel ding ahi. Vo Israel mi tampi to nakidei nungin, tun kahenga hung kile kit din nakigoi!
Jer 3:2 Khodah-in Ihangvum lam ven, hoilai khu min naluppi louna um nalaiyam? Arab min gamthip laiya chom ding mi anga bangin, lampam dunga dongma na-ngah le len, notin napangin gamsung nasuboh tai.
Jer 3:3 Hijeh a chu go julou, gobah jong lha lou ahitai. Noti bep bep nahitan, jum lam jong nahepoi.
Jer 3:4 “Atupi hin kajah a, ‘Kapa nahi, kaneo laiya pat neilungset jinge.
Jer 3:5 Neilunghan jing lou ding, neikhel tan jing lou ding ahi,’ nati. Vo Israel hiche hi naseiyin, thilse ijakai la nabolsoh hel tai,” ati.
Jer 3:6 Josiah lal laiyin Pakaiyin kajah a, “Numei kitah lou hiche Israel khun ipi abol namu tah-em? Keima eidalhan, Ihangvum sang lai lai, thinglim noi dung tin a notin apangtai.
Jer 3:7 Hichengpi khu gabolta jongle kahenga hung kile kit din kagel’e. Hungla ahung kile tapon, asopi kitah lou nu Judah-in achonna jouse akimudoh tai.
Jer 3:8 Israel’in eidalhah a notia apanjeh a kadaa kadel mang hi Judah-in amudoh tai. Ahinla Israel sopi kitah lou nu Judah-in kichatnan anei dehpoi. Ama jong noti asoh tai.
Jer 3:9 Jachatnan jong anei deh poi. Thingphung song phung ahouvin, mito ajongin gamsung asuboh tai.
Jer 3:10 Hicheng abol nung hin, Israel sopi kitah lou nu Judah kahenga hung ding bangin akilep’e; alung thengpoi. Kei-Pakaiyin kasei ahitai,” ati.
Jer 3:11 Israel’in dalha jeng jongle kitah lou nu Judah sang a Ama dinga aphat johna lai thu Pakaiyin kajah a aseiye.
Jer 3:12 Israel jah a gaseipeh din kajah a, “Kitah lou Israel kaheng hinjon kit’in. Hepi them kahin, nalung han ponge; itih-in lung dammo den ponge.
Jer 3:13 Pakai na-Pathen nadouva nathepmo thu bou kaseipeh nahi. Thinglim noi dunga gamdang pathente to nakideiya, Kei thupeh chengse nanit lou chu phongdoh-in. Kei-Pakaiyin kasei ahitai.
Jer 3:14 “Kitahna neilou mite, hung kile kit’un; kami nahiuve. Khotin a mi khat khat le phungtin a mi ni ni kalhendoh a Zion mol’a kalepui ding nahiuve.
Jer 3:15 Kasei ngai mite navaihom diuvin peng ting, chingthei tah le ima hethem tah a navaihompeh diu ahi.
Jer 3:16 Gamsunga napunjal tengu leh Keima Kitepna Thingkong kiseipoh taponte. Thingkong chu ngai jong ngaito pha lou, gel jong geldoh lou ding ahiuve. Ngai jong sapouvintin, achom khat jong semdeh pouvinte.
Jer 3:17 Phat alhin tengleh Jerusalem hi, ‘Pakai Laltouna’ kiti ding, Keima hou dia namtin vaipi hung kikhom diu ahi. Louchal tah le lungthim gilou tah a agel’u chu bol tapouvinte.
Jer 3:18 Sahlam gam asohchan nau muna konin Israel le Judah hung kijot lhonin tin, apu apateu kapehsa gam chu tonsot goulo dia ahinjot diu ahitai,” ati.
Jer 3:19 Pakaiyin aseiyin, “Israel, nang hi kachapa hisah a Vannoi leiset’a dei umtah Gamhoi pen tah peh kagot nahi. Hepa neitia neijamsan-louhel ding kadeiye.
Jer 3:20 Hinla ji numei kitah lou bangin Keidin nakitah hih hel’e. Kei-Pakaiyin kasei ahitai,” ati.
Jer 3:21 Molvum a ogin khat akijan, Israel ka le tao gin ahi. Ajeh chu hinkhoa chonsea Pakai a-Pathenu ahaiyu ahitai.
Jer 3:22 Pakai dalhaa vahmang jouse hung kile kit’un, Nadamsah-un tin mi kitah naso diu ahi. Nang hon, “Pakai i-Pathenu heng ihinjon tauve.
Jer 3:23 Lhangvum a ihouvu doi chu pannabei beh ahibouve. Israel panpina chu Pakai i-Pathen’uva kona kimu bou ahi.
Jer 3:24 Jachatna pathen-Baal kihou vang hin kelngoite le ganchate, chapa chanu khanglui laiya pat ipu ipateu kholsa nei le gou geiya eisuh mangpeh-u ahitai.
Jer 3:25 Jachat manin lumu hitin, jachatna ponkhun kikhute. Eiho jong ipu ipateu jong Pakai i-Pathenu douna chonse jing jeng ihiuve; itih-in athupeh chengse init pouve,” natiuve.
Jer 4:1 Pakaiyin, “Vo Israelte, hung kile kit nahiule, kaheng nahinjot diu ahi. Kamah ten milimdoi ho napaiyu leh Kei dia nakitah diu,
Jer 4:2 Kei min a nakitep diu ahi. Chuteng namtinin kahenga vang thum’un tin, eivahchoi diu ahi,” ati.
Jer 4:3 Pakaiyin Judah mite le Jerusalem jah a aseiyin, “Nalou lho lou kilho ngim’un, ling le khao lah a muchi tu hih-un.
Jer 4:4 Na-Pakaiyu Kei to ikitepnau nit jingun, kahenga din kipedoh-un Judah le Jerusalem mite. Nabol louvu leh thilse nabol jal’uva kalunghan nachunguva meikou banga kou ding ahi. Akah teng aphel mit ding koima umponte,” ati.
Jer 4:5 Gamsung thongsoh-in sumkon mut’un, Gingtah le kichentah-in mut’uvin! Judahte le Jerusalem mite Kulpi kaisa khopi dunga jamlut din seipeh-un.
Jer 4:6 Zion lampi hil’uvin lang, Kinomsot dauvin, kihinsona din jam’un! Sahlam gama manthahna melse tah chu Pakaiyin ahinpui lut ding ahi.
Jer 4:7 Akiselna hungkondoh sakei bangin Vaipi sugam ding ahung kipatdoh tai. Judah gam sumang dia hungkon ahi, Judah khopi ho ahomkeova ajam a, Koimacha cheng lou ding ahi.
Jer 4:8 Pakai lunghan kichat tijat umtah chu Judah gama konin akitolmang tapoi. Khaodip ponsil’in kap’in maovun!
Jer 4:9 Pakaiyin, “Hiche nikho chuleh leng le lalte meidoi gam’unte; Thempute kinlih leuvun tin, Themgaote kisudong diu ahi,” ati.
Jer 4:10 Keiman, “Hatchungnung Pakai, Jerusalem mite nalhem lhadel tai! Cham leng ding ahitai natin, tunla alol’u leh chemjam akitosoh tai!” kati.
Jer 4:11 Jerusalem mite chu nelgama kona khohui savet vut’in ahin nunkhum diuva kiseipehna ding phat ahung lhunge. Hiche hui chu bohsi semhoh dia olcha cha nung khohui hiponte.
Jer 4:12 Pakai thusah a hung nung khohui chu hu neitah ding ahibouve! Amite chunga thu kitan phongdoh hi Pakai Amatah ahibouve.
Jer 4:13 Ven, melma chu meilom ahung bange! Agalsatna kangtalai ho chimpei kipei abangin, asakolte la muvanlai sangin ajangkhai jo’uve! Mangthah a mah thah ihitauve!
Jer 4:14 Vo Jerusalem, huhhinga naum theina din nalungthima thilse kisop lhah-in. Itih chan geiya chonset thu jeng nagel gel ding ham?
Jer 4:15 Dan khopi le Ephraim thinglhang gama hungkon thangkouten thuse jeng aphonguve. !
Jer 4:16 Gamla tah a kona melma hungkon chu nam pumpi le Jerusalem mite seipeh dinga hung ahiuve. Hiche melmate hin Judah khopi ho hohsal’un tin,
Jer 4:17 Pakai doumah abol jal’uva Jerusalem mite aumchah-uva louhon banga ahon diu ahi. Pakaiyin aseitai.
Jer 4:18 Vo Judah, nachonna le nathilbol jeh a hiche thilse hi nachunga hung lhung ahitai. Hiche gentheina hi nachonset nan asosah ahin, nalung lai gil geiya ahopai ahitai. Jeremiah-in amite alung gimpi
Jer 4:19 Anai, anat dan kathoh joupoi! Kalung ana behseh-in akithinge! Ka-umthim theipoi, sumkon gin kajai, Gal-kho kisap gin kajai!
Jer 4:20 Manthahna ahung lhung thom thomin, Gam pumpi ahomkeovin akijamtai. Hetman louvin kaponbuh chengseu asuseuvin, Athoukang len jouse abottel tauve.
Jer 4:21 Iti gal husa ka-ngai ngaiyuva, Sumkon gin ka-ngai ngai diu ham?
Jer 4:22 Pakaiyin, “Kamite angol’un eihepouve, Chapang ngol abanguvin, Imacha ahekhen theipouve. Thilse bol’in ahapan’un, thilpha bol’in apang pouve,” ati. Manthahna hung Jeremiah-in amu
Jer 4:23 Leiset kavet le ahomkeo, Vanthamjol jong athim’e!
Jer 4:24 Molsang ho kavet le akithingun, Thinglhang jouse alonle le jengui.
Jer 4:25 Mihem khatcha kamutapon, Vachate geiyin aleng mangtauve.
Jer 4:26 Gampha lai jouse nelgam asoh tan, Khopi jouse akeosoh tai, Pakai lunghan natsat jeh-in!
Jer 4:27 Pakaiyin leiset pumpi gammang lai soh ding, asuhmang din vang aseipoi.
Jer 4:28 Leiset lunghemin tin, Vanthamjol mu thim ding; Pakaiyin aseisa ahitai, Lung khel kitta ponte. Atoh ding dol abolsa ahitan, Nungkhel kit taponte.
Jer 4:29 Sakol chungtoute le thal kapthemte husa a Mitin jamsoh ding ahi. Abang gammanga jamlut’un tin, Konkhat’in songpi lah bel’unte. Khosung kamsoh-in tin Koiman chen nan neikit ponte.
Jer 4:30 Vo Jerusalem, akichai nahitai! ldia jong ponsandup kisil nah nah a Sana pouva kijempal lea Mit-lou pou kinujol nahim? Pannabei seh a kijemhoi nahin, Nadongmaten napaiyun tha din nago jo’uve!
Jer 4:31 Numei naoso nat ka gin tobang kajan, Cha masa neiya thoh lel numei tao gin tobang kajai. Ka gin chu haimo hel’a Jerusalem husa ahin, Khut’in mi asangin, “Akichai kahitai! Eithat din ahungtauve,” ati.
Jer 5:1 Jerusalem mite, nakholai dunga lhaiyun, Nakimvel veuvin! Kimu chensoh-uvin! Kailhang dung jouse gahol’un! Thildih bol mi khat beh Pathen dia kitah mihem namu’vem? Namudoh pou pouvu le Pathenin Jerusalem ngaidam inte!
Jer 5:2 Pakai hou beh nakisah vangun, Nasei bangin nabol pouve.
Jer 5:3 Pakaiyin kitahna bou ahol’in, Naden tah vangun iman nagelpouve; Namehgep tan, nahsah-in naneipouve. Nalungtah-in chonset lung naheipouve.
Jer 5:4 Hichun ken, “Hiche ho hi vaicha le kho pholou, Ngol chon chon mi, A-Pathenu thildei hetoh lou, Pathenin atohsah nom helouvin kageltai.
Jer 5:5 Thunei vaipote henga cheng ting, Amaho to gakihou tange. Pathen lungdei heteiyun tin, Pakaiyin atohsah nom’u heteiyunte,” kati. Ahinla abonchauvin Pakai thaneina asan dauvin, Athu angai pouve.
Jer 5:6 Hijeh a chu gamlah a sakeiyin atha diu, Gamthip’a hungkon kamkeiyin ahemal’uva, Akholai dunguva lutnun chang’untin, Apotdoh doh le abotel jeng diu ahi. Ajeh chu achonsetnau atamval’in, Aitih-in Pathena konin avahmang jingui.
Jer 5:7 Pakaiyin, “Kamite chonset iti ka-ngaidam ding ham? Eidalhauva pathen lhem houvu chu. Kamite ava van kavah-in, Amaho mito ajongun, noti jeng to akivop’ui.
Jer 5:8 Gam sakol kivah thao huh tah abangun, Aheng akom jinu ajonpi nom cheh-ui.
Jer 5:9 Hijat abolnauva talen kapeh da a, Hitobang jat mite chunga hi phu kalah lou ding ham?
Jer 5:10 Kamite lengpilei vatchai dia melma kasol’a, Suhbei hel ding hi hih jongle, Abah chengse kamal ngimsah ding; Ajeh chu abahho hi keiya ahipouve.
Jer 5:11 Israelte le Judahten eijoulhep del’ui. Kei-Pakaiyin kasei ahitai,” ati.
Jer 5:12 Pakai miten Ama aseilep’un, “Imacha boldeh ponte. Hahsatna jong toh poute; gal jong idou dauva kel jong ihet lou diu ahi,” atiuve.
Jer 5:13 Amahon, “Themgaoho jong imacha hilou, hui keo bep, Pakai thupeh bon neilou ahibouvui.
Jer 5:14 Pakai Hatchungnung Pathenin kajah a, “Jeremiah, hiche miten hitobang thu aseijeh-un, nakamsunga kathu hi meikouva kalensah ding ahi. Mipi chu thinggosa bang diu, mei chun akah diu ahi,” ati.
Jer 5:15 Vo Israelte, nang ho delkhum dia gamla tah a kona Pakaiyin nam khat ahintol ding ahi. Apao nahet lou, nam lui tah le hattah nam ahi.
Jer 5:16 Asepaiteu chu hattah le thal kap them, hepina beihel’a mi that jeng ahiuve.
Jer 5:17 Namuchi nachivo le naneh ding jouse nehgam peh-unte. Nachateu numei pasal nathagam peh jeng diu ahi. Nakelngoi honteu le bong hon that gam’un tin, nalengpitheiyu le olive thing jouse asuhgam diu ahi. Asepaiteu chun nakisonpiu kulpi kikaikhum khopi jouse jong sumang’unte.
Jer 5:18 Pakaiyin aseiyin, “Hiche lai jenga jong hi kamite kasuhgam soh lou ding ahi.
Jer 5:19 Idia thil hijatpi kabol adoh tengu, seipeh-in Jeremiah, Kei eidon dauva agamsunguva jong gamchom pathente ahouvu leh, mi gamsunga het phah loute jenlea pang diu ahi,” ati.
Jer 5:20 Pakaiyin aseiyin, “Jacob chilhahte seipeh-un, Judah chate hil’un:
Jer 5:21 Ngai phauvin, mi-ngol michavai, mit neiya mu theilou, nakhang neiya jathei loute.
Jer 5:22 Pakai chu kahi; idia neigin dau ham? Ipi dinga ka-angsunga tija louhel, kithing lou nahiuvam? Twikhanglen kidil dil jongle akhokal louhel din aitih a um jing dingin neldi kakoiye. Twikhanglen kinuh nuh jongle akhokal deh’ lou ding, twi kinong hamje ju jongle tumkeh deh ponte.
Jer 5:23 Ahinla nang ho pi hi! Nalungtah bet but’un, doumah mah-in nakhangui; kiheiyin neidalha jenguve.
Jer 5:24 Kumseh a chuh le khal’a gotwi kalonsah a lhosoh kamusah vangun jabol din neigel hih hel’ui!
Jer 5:25 Jabol malah nachonset nauvin thilpha kabol jouse aselmang tai.
Jer 5:26 “Kamite lah a migiloute achengun, min vacha matna dia lenpel ason bangin, mi achanglhi le leuvin thang akampeh-ui.
Jer 5:27 Vathang kamhatten paipeh dimset’a vacha apoh bangun, athil chomdoh-u in dimset set’in akoiyui. Hiche hi hatna le kisonna haona aneiyu ahibouve.
Jer 5:28 Antui tui nea athao lo’u ahitai. Thilse bol chimtih aneipouve. Chagate chan lom achansah pouvin, genthei hesohte adih-in abol pouve.
Jer 5:29 “Hichea hi Kei Pakaiyin abol jouse jal’a hi talen kapeh ding ahi; hiche nam mite chunga phu kalah ding ahi.
Jer 5:30 Gamsunga tijat’a kinlih hel theina thil asoh tai;
Jer 5:31 Themgaoten thujou jeng aseiyun, Themputen jong Themgao ho thusah-in vai ahom’un, kamite ajada aum deh pouve. Ijakai akichaisoh teng ipi abol diu hitam?” ati.
Jer 6:1 Vo Benjamin chate jamdoh loiyun! Jerusalema konin jamdoh-uvin! Tekoa sumkon mut’un, Beth-Haccherem a hetsahna meikou gade’uvin! Sahlama kona hahsatna le manthahna hung lhung ding ahitai.
Jer 6:2 Zion khopi ahoi lheh vangin kisuse ding ahitai;
Jer 6:3 lengten asepaiteu puma achenpha diu ahi. Khopi kimvel’a ponbuh kison’un tin, ason nom nom na akison jeng diu ahi.
Jer 6:4 Amahon, “Jerusalem delkhum din kigon! Kigo’uvin, sunlai tah a idel khum diu ahi!” atiuve. Hijongle, “Ageitai, nisa lhumpai ding ahitai; nilim akisung pantan ahi.
Jer 6:5 Jan teng delkhum taute, khopi kulpi jouse suse naute,” akitiuve.
Jer 6:6 Hiche leng ho hin Jerusalem khopi umna dia thingphung aphuh-uva leipal asesang diuvin thaneipen Pakaiyin thu apetai. Pakaiyin, “Hiche khopi hi agilou behseh-e, talen kamatsah ding ahi.
Jer 6:7 Twikul’a twi achim jing bang khun, Jerusalemin achonsetna thah jingin aneiye. Khopi sunga pumhat thu le manthahna thu jeng kajai. Veiset le mahapu jeng kamui.
Jer 6:8 Jerusalem mite, hiche gimna ho hi hilchah nan gel’un, achutiloule kadalhah diu nahi; nakhopiu akeova kajampeh a, koiman chenna anei lou ding ahi,” ati.
Jer 6:9 Thaneipen Pakaiyin kajah a, “Lengpi ga kilou heothet banga Israel hi akeohel’a kakoi ding ahi. Phat umpet a najo chan nahuhdoh loi ding aphai, ati.”
Jer 6:10 Kenjong, “Gaseipeh ing gihsal jong leng kathu angai nah diu ham? Lungtah-uva Nang seibon ngai louvu; sei dia neihil ho geiya einuisat bep’uva chu.
Jer 6:11 Achunguva nalunghan hi kathoh joupon, Pakai; im jong ka-imjou tapoi,” kati. Hichun Pakaiyin kajah a, “Kholai dunga kichem chapang ho lah le gollhang ho kikhopna lah a khun kalunghan sung lhan. Anupa pauva kiman chomsoh a, tehse kembet geiya kikhen lou ding ahiuve.
Jer 6:12 A-in jouseu midang kipea, alouvu le ajiu numei ho geiya midang kipe ding ahi. Hiche gamsung mite hi talen kamatsah got ahi.
Jer 6:13 Alen aneovin lamdih lou cheh a sum mu ago’uvin; Themgao ho le Thempuho geiyin mipi lepthol’in abol’ui.
Jer 6:14 Kamite thohna maha ho hi thivun koh mai maiyin agel’ui. Imacha apha khuhsung umlou, ‘Ijakai apha cheh nai,’ atiuve.
Jer 6:15 Hitobang kidah dah um thil abol tengule jahcha dom nauvam? Ajahcha naisai pouve; jumle jaje jong helou ahiuve. Hijeh a chu adang ho banga kijamchap diu ahi. Talen kapeh teng kichai diu ahitai. Kei-Pakaiyin kasei ahitai,” ati.
Jer 6:16 Pakaiyin amite jah a, “Lamsom dunga dingun veuvin. Lamlui ho hol’un lang lampi phapen umna dongun. Hiche lampi chu juiyun, lung mongin hinguvin nate,” ati. Ahinla amahon, “Jui pouvinge,” atiuve.
Jer 6:17 Hichun Pakaiyin kho-ngah ding alhengdoh-in, sumkon gin ngaipha din a-ngansei. Amahon, “Ngai pouvinge,” tin aseiyui.
Jer 6:18 Hijeh chun Pakaiyin, “Namtin vaipi ngaiyun, kamite chunga hung lhung ding hi kihilnan neiyun.
Jer 6:19 Ngaiyin leiset’in! Kahil ngai lou kathu nit louva aum jeh-un hiche mite hi manthahna kalhut khum diu ahi.
Jer 6:20 Sheba gama kon le gamla tah tah a kona gimnamtui pou eihinpoh peh-u chu ija kagel beh ham? Athilto’u la sang pong ting, kilhaina apeh-u jong lung lhai nan nei ponge.
Jer 6:21 Hiche mite hi kakipalsah a kalhuhsah ding ahi. Apa cha chan thiuvin tin, gol le pai heng le kom thikhom diu ahi,” ati.
Jer 6:22 Pakaiyin, “Sahlama konin japi ahung kitol’in, nam hunei tah khat gal bol din akigoi.
Jer 6:23 Thalpi le chemjam akigot’un, hepina neilou engse tah ahiuve. Ahusau Twikhanglen kinon gin abangin, hamve vun sakol chunga ahung kitol’ui. Jerusalem to kisat din akigotauve,” ati.
Jer 6:24 Jerusalem miten, “Thuthang kajauvin, kakhut’u ahihsoh tan, numei naoso nat thoh lel kabanguve.
Jer 6:25 Gamlah a potdoh pouving ting, lamlen jong hopa pou vinge, kamelmateu manchah kichoisan apangun, kakimvel’uva kichat tijatna jeng jeng aum’e,” atiuve.
Jer 6:26 Pakaiyin amite jah a, “Khaodip pon sil’in vutvam lah a kijam’un, chapa chang khat thi nia bangin kap’un, nasumang diu hetman louva hung ding ahi.
  1   2   3   4   5   6   7   8   9


Verilənlər bazası müəlliflik hüququ ilə müdafiə olunur ©kagiz.org 2016
rəhbərliyinə müraciət